පහන් මඩුවේ තවත් අරුතක්

සුබ අලුත් අවුරුද්දක් වේවා

උග්ගල් අලුත්නුවර  පහන් මඩු ශාන්ති කර්මයේ තවත් අරුතක් ගම්‍ය වෙයි. ඒ අලුත් අවුරුද්දට සුබ පැතීම ය. එය පහන්මඩු ශාන්ති කර්මයට අමුතුවෙන් එක් වූ සිරිතක්  නොවන බව සියුම්ව විමසද්දී පැහැදිලිවම පෙනීයයි.

බිනර මාසයේ සිට උඳුවප් මාසය දක්වා කාලය යක්ෂ මාස ලෙස හැඳින් වෙන අතර  බල උඳුවප් හෙවත් දළ වශයෙන් දෙසැම්බර් මාසයේ දී  යක්ෂයන්  පළවා හැර දෙවියන්ගේ  දිවැස්ලෑම ලැබෙන්නට මේ ශාන්ති කර්මය කෙරෙන බවත් එහි කවිගායනා මෙන්ම රැඟුම් මගින්ද පැහැදිලි කෙරෙයි.

මෙහි දී  පත්තිනි අනුහසින් දෙවොල් යකුන් දෙවොල් දෙවියන් බවට පත් කිරීමත්, මරණයට පත්ව සිටි පාලඟ කුමරුන්ට පණ ඉපැද්දීමත් නිරූපණය කෙරෙයි.  එය නොමරා දේවත්වයට පත් කිරීමක් හා පණ දී දේවත්වයට පත් කිරීමක් ද වෙයි. මෙහි දී වීදිය පුරා පත්තිනි ආභරණ  වැඩම වන අවස්ථාවක් වන අතර එමගින් දෙවියන්ට වැඩීමට වීදි සුද්ද වන බව දැනමුත්තෝ පවසති. සියලු කටයුතු අවසන දී කියවෙන සෙත් කවි ගායනා මගින් මේ ගමටත් අහල ගම් හතටත් රටට හා මුළු් ලොවටත් සෙත් පතා දේව මාස උදවන බවත් සියලු දෙනාට නවවසරක් එළඹෙන බවත් කියවෙයි. ලෝකය එළඹෙන වෙසක් මස දී බුද්ධ මංගල්‍යයට දේව රැකවරණය ලැබෙන බව ද හැඟ වෙයි. සියලු ලෝසතුන්ට සෙත් ශාන්තිය පැතීම අවසන

ගමේ සැමටත්, අසළ ගම්වල අයටත්, මුළු රටටත් ලොවටත් සුබ අලුත් අවරුද්දක් වේවායි පද්‍යයෙන් මෙන්ම ගද්‍යයෙන් ද සෙත් ශාන්තිය කරති. මේ ගමේ ඇත්තන් සමග

ලේඛකයා ද සුබ වාසනාවන්ත අවුරුද්දක් සැමටම උදා වේවායි ඉත සිතින් පතයි.